Зошто ДОО е најпреферирана форма за влез на пазарот во Северна Македонија?

Ако размислувате за проширување на вашиот бизнис во Северна Македонија, една од првите одлуки што ќе треба да ја донесете е изборот на соодветна правна форма за локалната компанија. Меѓу достапните опции, Друштвото со ограничена одговорност (ДОО — за повеќе основачи) или ДООЕЛ (за еден основач) постојано се истакнува како најпопуларен и практичен избор. Но, зошто токму истата е најпреферираната форма за влез на пазарот?

Еве ги причините зошто ДОО е прв избор и за домашни и за странски инвеститори при влез на македонскиот пазар:

1. Ограничена одговорност = Намален ризик

Најголемата предност на ДОО е содржана во самото име: ограничена одговорност. Сопствениците одговараат само до висината на нивниот влог. Ова ги штити личните средства и го намалува финансискиот ризик — особено важно кога се навлегува на нов пазар.

Оваа правна заштита значи дека ако компанијата направи долгови или настанат обврски, личниот имот на сопствениците — како нивниот дом, заштеди или возила — не може да се користи за покривање на тие обврски. За странските инвеститори кои не се запознаени со локалната деловна средина, ова претставува важна сигурност што овозможува влез на пазарот без непотребни правни или финансиски ризици.

2. Прифатлив основачки капитал

За да се основа ДОО во Северна Македонија не е потребно големо вложување. Минималниот основачки капитал изнесува 5.000 евра и треба да се уплати целосно пред или при регистрацијата. Овој износ се смета за умерен во споредба со многу земји од ЕУ и нуди добар баланс меѓу достапност и кредибилитет.

3. Едноставен и брз процес на регистрација

Формирањето компанија во Северна Македонија е релативно едноставно. Со помош на адвокат или овластен регистрациски агент, вашето ДОО може да се основа за неколку дена. Документите може да се поднесат електронски, а не е потребно физичко присуство при регистрацијата — што е голема предност за меѓународни претприемачи.

Целиот процес — од подготовка на основачкиот акт до регистрација во Централниот регистар — е поедноставен и дигитализиран. Сопствениците може да овластат локален претставник со полномошно за да ја заврши регистрацијата во нивно име. По регистрацијата, компанијата добива даночен број и може да отвори банкарска сметка и да започне со работа.

4. Дозволена е 100% странска сопственост

Нема никакви ограничувања за странска сопственост во ДОО. Странско физичко или правно лице може да поседува 100% од уделите, без потреба од локален партнер или резидентен директор.

Ова е клучна предност за странски инвеститори кои сакаат целосна контрола над македонската компанија. Тоа овозможува стратешките одлуки да останат во рацете на инвеститорот, а истовремено да се почитува локалното законодавство. Оваа флексибилност е идеална и за холдинг структури или подружници во рамките на интернационални групации.

5. Флексибилна структура на управување

ДОО нуди флексибилност во управувањето – може да се управува од едно или повеќе лица.

Оваа едноставност го прави идеален за стартапи и мали до средни претпријатија, кои често се потпираат на компактни тимови и брзо носење одлуки. Основачите имаат целосна слобода да ги дефинираат внатрешните правила за управување во основачкиот акт, вклучително и правила за носење одлуки, распределба на добивка или наследување.

6. Поволна даночна политика

Северна Македонија има рамен корпоративен данок од 10%, еден од најниските во Европа.

Овој едноставен и нископроцентен систем им нуди предвидливост на бизнисите, што е особено привлечен за странски инвеститори и мултинационални компании кои сакаат да ја оптимизираат својата даночна изложеност. За разлика од многу земји каде даночните стапки растат со профитот или имаат секторски додатоци, Северна Македонија применува иста стапка за сите компании, независно од големина или индустрија. Дополнително, добивката што повторно се инвестира во бизнисот обично не се оданочува, што го стимулира растот и проширувањето.

*

Заклучок

Изборот на соодветна правна форма е еден од најважните чекори при влез на нов пазар. Во Северна Македонија, ДОО/нуди урамнотежена структура со силна правна заштита, ниски бариери за влез и одлична флексибилност — сè тоа во една поволна даночна средина.

Без разлика дали сте основач на стартап, инвеститор или веќе етаблиран бизнис што се проширува, ДОО претставува практичен и економичен начин за влез на македонскиот пазар со самодоверба.

**

Напомена: Овој текст е подготвен исклучиво за информативни цели и не може да се смета за правен совет или упатство за конкретно постапување. Правните прашања се сложени и секој случај има свои специфики кои мора да се разгледуваат поединечно. Токму поради тоа ви предлагаме да се консултирате со стручно лице- Адвокат кои може да најде уникатно решение за вашето правно прашање.